Instituti Kombëtar i Shëndetësisë Publike të Kosovës ka njoftuar për shtatë raste të reja të fruthit në Kosovë, duke e çuar në 172 numrin total të rasteve të konfirmuara deri më tani.
Sipas të dhënave të IKShPK-së, më shumë se 95 për qind e rasteve të konfirmuara me fruth janë persona të pavaksinuar me vaksinën MMR.
Instituti thekson se këto të dhëna dëshmojnë rëndësinë e vaksinimit në mbrojtjen e fëmijëve nga fruthi, ndërsa u bën thirrje prindërve që t’i vaksinojnë fëmijët sipas kalendarit të rregullt të vaksinimit.
“Vaksinimi është mbrojtja më e mirë – së bashku mbrojmë shëndetin e fëmijëve”, thuhet në njoftimin e IKShPK-së.
Instituti ka bërë të ditur se, përveç vaksinimit të rregullt, është intensifikuar edhe vaksinimi i vonuar, i njohur si catch-up, për fëmijët që për arsye të ndryshme kanë shtyrë marrjen e vaksinës.
“IKShPK njofton qytetarët se, krahas vaksinimit të rregullt sipas kalendarit të vaksinimit, është intensifikuar edhe vaksinimi i vonuar (catch-up), duke u mundësuar vaksinimin e fëmijëve që për arsye të ndryshme kanë shtyrë vaksinimin”, thuhet në njoftim.
Sipas IKShPK-së, gjatë këtij viti janë vaksinuar përmes vaksinimit catch-up mbi 3,176 fëmijë të grupmoshës 2–5 vjeç.
Instituti e ka vlerësuar pozitivisht angazhimin e prindërve, profesionistëve shëndetësorë, institucioneve dhe qytetarëve në rritjen e vaksinimit dhe në mbrojtjen e fëmijëve nga fruthi.
IKShPK u ka bërë thirrje qytetarëve që të vazhdojnë me vaksinimin dhe të kontribuojnë në parandalimin e përhapjes së sëmundjes.
