Shërbimi Spitalor Klinik dhe Universitar i Kosovës ka reaguar pas ndarjes nga jeta të ish-drejtorit të Qendrës Klinike Universitare të Kosovës, Ali Sadriu.
Përmes një njoftimi publik, ShSKUK ka vlerësuar figurën dhe kontributin e Sadriut në sistemin shëndetësor të vendit, duke theksuar se ai la gjurmë të rëndësishme në institucionet publike ku shërbeu.
Sipas ShSKUK-së, Sadriu njihej për profesionalizëm, përkushtim dhe integritet, ndërsa gjatë periudhës sa ishte në krye të QKUK-së, ai tregoi përgjegjësi dhe vizion në përmirësimin e shërbimeve shëndetësore për qytetarët.
Në mesazhin e ngushëllimit, ShSKUK u ka shprehur ngushëllime familjes Sadriu, kolegëve dhe bashkëpunëtorëve të tij, duke nënvizuar se kujtimi për Ali Sadriun do të mbetet i çmuar.
“Gjatë udhëheqjes së tij, ai dha shembull të përgjegjësisë dhe vizionit në interes të shërbimeve shëndetësore për qytetarët. Në emër të ShSKUK-së, shprehim ngushëllimet më të sinqerta për familjen, kolegët dhe të gjithë ata që e njohën dhe bashkëpunuan me të. Qoftë i përjetshëm kujtimi për të!”, shkroi ShSKUK.
