Shefi i Grupit Parlamentar të Aleancës për Ardhmërinë e Kosovës, Besnik Tahiri, gjatë Shqyrtimit të dytë të Projektligjit mbi ndarjet buxhetore për Buxhetin e Kosovës për vitin 2024, tha se ky është një dokument puro politik.
Gjatë debatit parlamentar në Kuvend, Tahiri tha se Qeveria aktuale po shfrytëzon buxhetin e vendit për përfitime partiake.
“Pra, nuk është Lëvizja Vetëvendosje dhe Kuvendi i Kosovës i cili e mbikëqyr punën e Qeverisë, mirëpo është Qeveria, e cila në emër të votës së tyre përcakton dhe bën çka do. Ky ligj i ka 64 amandamente, e nga këto 64, asnjë s’do të miratohet. Jemi duke folur për një dokument puro politik, të një partie politike, e që e cila e shfrytëzon buxhetin e Kosovës për përfitime partiake, në kurrizin e këtyre deputetëve për të shpërndarë ndihma për dështimet e politikave qeverisëse gjatë këtyre 3 viteve. Ne sot kemi para nesh jo ligjin për buxhetin e konsoliduar të Kosovës, por kemi një ligj i cili është kthyer në dokument të një partie politike, të një kabineti qeverisës. Fatkeqësisht, këta deputetë s’i ka pyetur askush dhe asnjë amendament nuk kanë mundur t’a fusin në këtë ligj”, deklaroi Tahiri para deputetëve.
Ndërkaq, sa i përket investimeve kapitale, Tahiri potencoi se për vitin 2023, Qeveria Kurti s’ka arritur ta shpenzojë 80 përqind të buxhetit.
“Për vitin 2022, shpenzimi i buxhetit për investime kapitale ka qenë vetëm 60 përqind, ndërsa për vitin 2023, ka qenë vetëm 35 përqind. Kjo nënkupton që diku rreth 80 përqind të buxhetit që ka qenë i destinuar për investime kapitale, s’ka arritur t’i shpenzojë”, shtoi tutje Tahiri.
