Dy të vdekur e një i plagosur është bilanci i një tragjedie në Itali, me autor një 45-vjeçar shqiptar.
Ngjarja e rëndë u regjistrua në Torremaggiore të Foggia-s, ku autori i identifikuar si Taulant Malaj vrau me thikë vajzën e tij 16 vjeçare, një shtetas italian dhe plagosi ish bashkëshorten.
Referuar mediave italiane, pas ngjarjes së rëndë fshihen motivet e xhelozisë.
Gjithçka nisi mesnatën e së shtunës kur 45-vjeçari, shkoi për të debatuar me ish-bashkëshorten e tij. Përpara se të takonte atë, shqiptari u përball me italianin Massimo De Santis, për të cilin dyshonte se kishte lidhje intime me ish gruan e tij.
Fillimisht ai u përlesh fizikisht me të e më pas e qëlloi me thikë duke e lënë të vdekur në shkallët e pallatit.
Pas italianit, shqiptari Taulant Malaj u drejtua për te ish-bashkëshortja e tij, por në tentativë për të sulmuar atë, ai goditi për vdekje vajzën e tij 16 vjeçare, Xhesikën.
E reja mësohet se tentoi të mbronte nënën e saj, e cila mbeti e plagosur nga sulmi i ish bashkëshortit të saj shqiptar.
Ky i fundit u arrestua vetëm disa minuta pas ngjarjes së rëndë fare pranë pallatit ku u regjistrua ngjarja e rëndë. Taulant Malaj rezulton të jetë me origjinë nga Selenica e Vlorës, ndërsa në shtetin italian punonte si bukëpjekës. /Tv Klan/