Nga viti 2005 është komunë në vete.
E për 20 vite, udhëheqësinë e komunës së Butelit në Maqedoni të Veriut e patën vetëm maqedonët.
Por në këto zgjedhje, situata është më ndryshe.
Kandidati i vetëm shqiptar për këtë komunë nga Bashkimi Demokratik për Integrim, Isamedin Azizi thotë se ky moment është historik.
Ai pret që më 19 tetor, këtë komunë që është e ndarë në dysh etnikisht, ta fitojnë shqiptarët.
“Situata është paksa më ndryshe për faktin që e kemi një kandidat shqiptar dhe ka filluar një mobilizim më i madh i komunitetit shqiptar dhe ka fillu të ngjallet edhe shpresa sepse është momenti që ndoshta mund të fitohet”, shprehet Azizi.
Azizi tregon se ky është një moment kthese pasi edhe në listat e votuesve prijnë shqiptarët.
“Në komunat e Butelit në listat e votuesve janë mbi 50% shqiptarë, një gjë e cila nuk ka qenë më herët, ne jemi të vetëdijshëm që situata në komunën e Butelit është e tillë pra banorët e Butelit e dijnë këtë realitet por ja që për arsye të ndryshme nuk kanë pasë të drejtë vote, adresat e banimit i kanë pasur në pjesë të tjera të Shkupit”, thotë ai.
Por deri tash, përkrahje zyrtarisht, Azizi thotë se nuk ka marrë nga koalicioni shqiptar VLEN.
“E mira në këtë proces zgjedhor sepse nga tabori politik shqiptar kemi vetëm një kandidat jam unë, partia tjetër kishte një kandidat por për çështje teknike iu refuzua nga KQZ-ja. Zyrtarisht ende deri tash nuk janë deklaruar që do të përkrahin kandidatin e vetëm shqiptar apo jo, por të shpresojmë që ditëve në vijim do të prononcohen VLEN-i si koalicion dhe pastaj do të shohin se si rrjedhin punët”, thotë Azizi.
Televizioni ka provuar të marrë një qëndrim edhe nga kryetari i Lidhjes Demokratike, Izet Mexhiti që është pjesë e koalicionit VLEN por i njëjti nuk ka kthyer përgjigje.
