Sulmuesi i krahut, Ermir Rashica është risia në listën e trajnerit të Shqipërisë U21, Alban Bushi. Bushi të mërkurën ka bërë publike listën e futbollistëve të ftuar për ndeshjet kualifikuese të “Euro 2025” për këtë muaj. Ai ka ftuar 24 futbollistë, përfshirë edhe Rashicën, i cili për herë të parë po grumbullohet me shpresat e Shqipërisë.
Rashica 19-vjeçar është pjesë e Skënderbeut të Korçës, ekip të cilit iu bashkua në verën e këtij viti nga Trepça ’89. Ai ka 6 paraqitje dhe 1 gol të shënuar për Kosovën U19, por që nuk ishte pjesë e saj në tri ndeshjet e fundit miqësore. Rashica ndeshjen e fundit me Kosovën U19, e ka luajtur në nëntor të vitit të shkuar.
Këtë edicion, Rashica ka 1 gol e 3 asistime në 12 paraqitje në Superligën e Shqipërisë me Skënderbeun. Këtë muaj, Shqipëria U21 i luan dy ndeshje në kuadër të kualifikimeve për Evropianin 2025 dhe të dyja në udhëtim. Më 17 nëntor, përballet me Rumaninë, ndërsa me 21 nëntor me Malin e Zi. Shqipëria U21 i prinë Grupit E me 9 pikë të mbledhura pas tri fitoreve në katër ndeshje të luajtura.
