Përzgjedhësi i Shqipërisë në futboll, Sylvinho, e di se çdo rezultat tjetër përveç fitores ndaj Andorrës do të ishte i papranueshëm për tifozët.
Braziliani Sylvinho thotë se lojtarët nuk janë të thyer pas disfatës nga Anglia në ndeshjen hapëse të kualifikimeve për Botërorin e vitit të ardhshëm që mbahet në Shtetet e Bashkuara të Amerikës, Kanada dhe Meksikë.
Shqipëria humbi 2:0 të premten nga Anglia në stadiumin ikonik “Wembley”. Por të hënën në “Arenën Kombëtare” në Tiranë, kuqezinjtë synojnë fitore me lojë të bukur ndaj Andorrës.
Ndeshja Shqipëri – Andorrë nis në orën 20:45 dhe i takon Grupit K, ku janë edhe Letonia dhe Serbia.
“Futbolli është i vështirë për të gjithë. Mësojmë nga gabimet dhe mundohemi gjithmonë të nisim nga fillimi në ndeshjet e ardhshme. Nuk është lehtë të luash ndaj Anglisë në ‘Wembley’. Ka lojtarë që luajnë në nivele të larta botërore, trajner të ri me shumë energji. Janë lojtarë që kryesisht luajnë në Premier League. Kemi qenë në lojë deri në pësimin e golit të dytë. Nëse nuk je i përqendruar ndaj një ekipi si Anglia, mund të pësosh 4-5 gola brenda 45 minutave. Është njëjtë si të luash ndaj Spanjës në ‘Santiago Berbabeu’. Nuk të lejohet të gabosh. Kemi parë lojën e Andorrës ndaj Letonisë. Kemi punuar për t’i gjetur dobësitë e kësaj përfaqësueseje”, ka thënë Sylvinho të dielën në konferencë për shtyp.
Shqipëria në stadiumin në Tiranë nuk ka fituar nga tetori i vitit 2023. Së fundi kishte fituar në miqësore ndaj Bullgarisë, 2:0.
Sylvinho ka theksuar se kanë analizuar lojën e Andorrës. Ai ka treguar anët e forta të Andorrës.
“Kuqezinjtë” me Andorrën janë përballur gjashtë herë. Dy ndeshjet kualifikuese për Kupën e Botës “Katari 2022” i fitoi Shqipëria me rezultat 1:0.
“Kemi parë lojën ndaj Letonisë. Kemi punuar për të gjetur hapësirat për të shënuar në ndeshjen e nesërme. Do të mundohemi ta bëjmë më të mirën që na ofrohet. Ndaj Anglisë duhej të mbroheshim dhe të gjenim hapësirat për të dalë para. Do të provojmë të luajmë ndryshe ndaj Andorrës. Futbolli është i vështirë, por duhet të gjejmë hapësirat. Andorra luan lojë defensive, kurse ne do të mundohemi të gjejmë mënyrën më të mirë gjatë ndeshjes”, është shprehur Sylvinho.
Ai ka paralajmëruar ndryshime si në aspektin taktik e po ashtu sa u takon lojtarëve.
“Ndeshja e dytë është shumë shpejt dhe mund të ketë ndryshime në aspektin taktik, por jo edhe ndryshime të mëdha të lojtarëve. Mund të kemi 2-3 ndryshime, por nuk mund të bësh shumë ndryshime brenda një periudhë të shkurtër. Duhet të gjejmë hapësirat për të shënuar gola. Ivan Balliu dhe Naser Aliji kanë shpenzuar shumë energji ndaj Anglisë, por do të kemi edhe pak kohë për të parë nëse do të mund të rikuperohen. Sa i përket sulmit mund të ketë ndryshime, por nesër do të marrim vendimet e duhura, pasi kemi disa emra që mund të nisin nga fillimi ndeshjen”.
Shqipëria është paraqitur dy herë në Evropian. Megjithatë pas paraqitjes në “Gjermania 2024” pati cikël dëshpërues në Ligën e Kombeve. Përfundoi e fundit në grup me shtatë pikë, ndërsa edicionin e ardhshëm do të paraqitet në Ligën C.
“Evropiani ka përfunduar ashtu si edhe gara e Ligës së Kombeve. Kemi nisur një cikël të ri. Nuk është e lehtë, pasi në Botëror vetëm i pari dhe eventualisht i dyti nga plejofi mund të kalojnë në Botëror. Lojtarët janë të motivuar, por neve na duhet vetëm të zhbllokohemi. Duhet të shënojmë gol për të sjellë entuziazëm. Do të mundohemi të luajmë bukur dhe të kthejmë entuziazmin te publiku”, ka thënë selektori i kuqezinjve.
Kapiteni Berat Gjimshiti e vlerëson të vështirë ndeshjen ndaj Andorrës.
Andorra të premten humbi 1:0 në shtëpi nga Letonia, një tjetër përfaqësuese inferiore e grupit.
“Edhe lojën ndaj Anglisë e kam konsideruar si mundësi. Ndoshta ju e mendoni ashtu në bazë të rezultatit, por ne si ekip nuk e ndajmë të njëjtin mendim. Ishte një mundësi për ne dhe sigurisht që Anglia është ekip e nivelit botëror dhe luan gjithnjë për trofe. Do të jetë ndeshje tjetër. Besoj se do të jetë e vështirë dhe e rëndësishme është të jemi të gjithë të përqendruar. Në letër duket e thjeshtë, por në futbollin që po luhet sot, nuk ka ndeshje të lehta”, ka thënë Gjimshiti.
Mbrojtësi i Atalantas ka shtuar se janë gati për të fituar ndeshjen ndaj Andorrës.
“Besoj se në futboll gjithmonë është presioni. Është ndryshe nga Anglia, pasi anglezët ishin favoritë, kurse ne tash jemi favoritë. Kam qenë edhe në barazimin 2:2 ndaj Andorrës. Ka shënuar dy gola në kundërsulme. Do të jemi gati për ndeshje”, ka theksuar Gjimshti.
Ai ka falënderuar tifozët për përkrahje.
“Kemi mësuar nga ndeshjet e kaluara, kemi biseduar me trajnerin se çka kemi gabuar. Besoj se nesër duhet të jetë një Shqipëri ndryshe dhe tifozëve t’u japim lumturi. Duhet të shohim një Shqipëri ndryshe, pasi duhet kujdes sepse mund të pësosh edhe nga këta kundërshtarë”, ka thënë Gjimshiti.
Ndeshjen e tretë Shqipëria e luan në Tiranë ndaj Serbisë më 7 qershor. Tri ditë më pas luan në udhëtim ndaj Letonisë në Riga.
