Kombëtarja e Shqipërisë në futboll ka shënuar fitore të rëndësishme në kualifikimet për kampionatin botëror 2026 si mysafire ndaj Serbisë sonte në Leskovc me rezultat 1:0.
Një gol i mrekullueshëm i Rej Manajt në minutën e dytë të kohës shtesë të pjesës së parë siguroi për kuqezinjtë tri pikë të mëdha në luftën për vendin e dytë në grupin K.
Të përzgjedhurit e brazilianit Sylvinho treguan lojë të mençur, duke u treguar të sigurt në mbrojtje dhe të rrezikshëm në kundërsulme.
Serbia e drejtuar nga Dragan Stojkoviq tentoi të krijojë disa raste shënimi, por lojtarët e saj u treguan të dobët në konkretizim.
Bajrami i Shqipërisë në minutat shtesë të pjesës ës dytë ishte ballë për ballë me portierin kundërshtar, por nuk arriti të shënojë golin e dytë.
45 minutat e para të ndeshjes u karakterizuan me tensione në shkallët e stadiumit në Leskovc.
Tifozët vendas kanë bërë disa herë thirrje antishqiptare dhe asnjëherë spikeri në stadium nuk ka kërkuar prej tyre që të ndalojnë, për çka edhe Serbia duhet të dënohet nga FIFA.
Shqipëria ndeshjet e radhës do t’i luajë kundër Andorrës në udhëtim më 13 nëntor dhe Anglisë si vendëse më 16 nëntor.
Pas gjashtë ndeshjeve, kuqezinjtë renditen në pozitën e dytë me 11 pikë, katër më pak se Anglia e para me 15 pikë nga pesë ndeshje. Serbia renditet e treta me 7, Letonia e parafundit me 5 dhe Andorra e fundit me një pikë.
