Përmes rrugës së kombit, kamionë me pako ushqimore nga Shqipëria erdhën në Kosovë.
“Fondacioni Mirësia” me seli në Shqipëri këtë të mërkurë iu bashkua aksionit për ndihmë familjeve të prekura nga vërshimet.
Nga ky fondacion ndihmën për bashkëkombësit në Kosovë po e shohin si detyrim moral, pasi edhe Kosova e kishte mbështetur Shqipërinë në kohën kur u përballë me tërmetin.
E “Fondacionit Mirësia” iu bashkua edhe “Fondacioni Amaneti” nga Kosova.
Këta të fundit thonë se kjo iniciativë ka ardhur pas gjendjes së rënduar të banorëve të prekur nga vërshimet.
Ndihmat u shpërndanë në Skenderaj dhe Mitrovicë. Ndërsa zyrtarë të dy komunave thonë se këto ndihma janë të nevojshme pas situatës së rënduar në terren.
Pas vërshimeve në këto komuna, shumë bamirës janë bashkuar për të mbledhur fonde për tejkalimin e situatës së rëndë. Madje sipas vlerësimeve të para, dëmet arrijnë dhjetëra miliona euro.
Kronika e realizuar nga Doresa Geci
