Këtë të enjte u miratua në Kuvendin e Shqipërisë projektligji për Amnistinë Penale. Në parim 116 deputetë votuan pro amnistinë, ndërsa vetëm 1 deputet votoi kundër.
Ligji për aministinë, i cili kërkonte shumicë të cilësuar, u miratua me votat e mazhorancës socialiste dhe të opozitës së grupimit Berisha-Bardhi.
Kundër ka votuar vetëm deputeti Agron Shehaj, ndërsa deputetja Ermonela Felaj abstenoi.
Në seancën e sotme kryeparlamentarja Lindita Nikolla bëri me dije se për këtë projektligj janë paraqitur amendamente nga dy deputetët demokrat Gazment Bardhi dhe Enkelejd Alibeaj.
Kuvendi miratoi edhe amendamentin e Gazment Bardhit për aministinë me 111 vota pro, 3 kundër dhe 1 abstenim. Në këtë amendament është këtkuar që të përfshihen në amnisti protestuesit e PD-së të dënuar, nën hetim apo të proceduar deri në datën 31 Mars 2024.
Amendamenti i Enkelejd Alibeajt nuk u miratua, ai mori 8 vota pro, 72 kundeë, 2 abstenime.
Sapo ligji të botohet në Fletoren Zyrtare, Amnistia Penale do u japë liri 700 të dënuarve. Nga ky ligj përfitojnë 1100 të dënuar dhe të paraburgosur, ku krahas 700 të dënuarve, 400 të tjerët do të përfitojnë ulje dënimi nga 1.5 deri në 2 vite burgim.
Amnistia Penale është një nga çështjet më të diskutuara, ajo është depozituar në Kuvend që në dhjetor të 2023, por mosdakordësia mes palëve bëri që votimi i draftit të shtyhej për 3 muaj.
Ministri i Drejtësisë, Ulsi Manja, tha në fjalën e tij në Kuvend se nga amnistia do të përfitojnë edhe protestuesit e opozitës, ndërsa theksoi se nuk përfitojnë prej saj personat e dënuar me burgim të përjetshëm, të dënuarit nga GJKKO dhe ata të akuzuar që janë në arrati./euronews.al/
