Shqipëria mbylli një rrugëtim fantastik këtë vit, duke u kualifikuar për herë të dytë në historinë e saj në një Europian dhe duke vendosur një rekord si e para e grupit, fakt që nuk kishte ndodhur më parë.
Trajneri Sylvinho e nisi me një humbje në Poloni, por në qershor mori dy fitore të vlefshme me Moldavinë dhe Ishujt Faroe, ç’ka pasoi me barazimin në Çeki dhe dy fitoret në shtëpi me Poloninë dhe Çekinë.
Më pas erdhi barazimi në Moldavi që solli kualifikimin dhe ndeshja e fundit me Ishujt Faroe, e mbyllur pa gola. Në mes tyre edhe një ndeshje miqësore me Bullgarinë e fituar 2-0. Padyshim që loja e Kombëtares ka ndryshuar dhe tashmë Shqipëria ka më shumë guxim dhe përpara gjen më shumë lojtarë sulmues, por një fakt tjetër interesant është ajo e mbrojtjes.
Duke luajtur në një rreshtim me katër mbrojtës, prapavija kuqezi është kthyer në një “bunker” në ndeshjet në shtëpi, pasi gjashtë takimet e fundit nuk ka pësuar gol, (një me Edi Rejën dhe 5 me Silvinjon), duke dëshmuar kështu një përqëndrim maksimal gjatë sfidave në “Air Albania”, ku për herë të fundit ka shënuar Italia para një viti.
Gjashtë ndeshje radhazi në shtëpi, Kombëtarja shqiptare nuk i kishte arritur asnjëherë në histori. Shqipëria qëndroi 4 takime në shtëpi duke mos pësuar gol, atë me Irlandën e Veriut (1-0), Andorrën (1-0), Uzbekistanin (1-0), të cilat ishin miqësore dhe me Luksemburgun (1-0), kualifikuese europiani.
