Kombëtarja e Shqipërisë në futboll, ka zyrtarizuar ndeshjen miqësore për muajin shtator, në të cilin do ta ketë edhe një përballje në kuadër të kualifikimeve për Botërorin 2026.
Federata Shqiptare e Futbollit (FSHF), të shtunën, ka njoftuar se Shqipëria do të luajë miqësore kundër Gjibraltarit.
Kjo miqësore zhvillohet më 4 shtator në “Europa Point Stadium” në Gjibraltar prej orës 18:00.
Miqësorja me Gjibraltarin është aranzhuar për shkak se Shqipëria në shtator e luan vetëm një ndeshje kualifikuese për Kampionatin Botëror të vitit të ardhshëm.
Kështu që, miqësorja me Gjibraltarin do ti shërbejë selektorit Sylvinho për ta përgatitur ekipin sa më mirë për ndeshjen kundër Letonisë, të cilën Shqipëria e luan më 9 shtator në stadiumin “Air Albania”.
“Në muajin shtator, Shqipëria ka vetëm një ndeshje zyrtare, atë kundër Letonisë në kuadër të kualifikueseve të Kupës së Botës 2026, që do të luhet më 9 shtator në stadiumin “Air Albania”. Për këtë arsye, stafi teknik ka vendosur të zhvillojë një miqësore, për të testuar gjendjen e lojtarëve para sfidës zyrtare”, ka shkruar FSHF në njoftim.
