Kidnapimi i tre policëve kosovarë nga Serbia, ka bërë që Shqipëria të ndërpresë të gjitha marrëdhëniet me këtë të fundit.
Kryeministri shqiptar, Edi Rama bëri të ditur se tashmë ka nisur një letër për presidentin francez, Emmanuel Macron dhe kancelarin gjerman Olaf Scholz, për domosdoshmërinë e zbatimit të planit franko-gjerman.
“Për sa kohë tre efektivët e Policisë së Kosovës vazhdojnë të mbahen në burg në Serbi, nuk ka asnjë mundësi që të ketë përparim në dialog apo deeskalim konkret pa kthimin e tyre në shtëpi. Madje nuk mund të ketë as normalitet në marrëdhëniet në mes Shqipërisë e Serbisë për sa kohë Serbia nuk i jep fund heqjes së lirisë së tre policëve të cilët nuk kanë kryer asnjë krim”, u shpreh Rama.
Sipas tij, rajoni nuk është as i kryeministrit, Albin Kurti dhe as i presidentit serb, Vuçiq dhe se ata duhet mbyllur në një konferencë normalizimi derisa të trajtohen të gjitha pikat.
“Interesi ynë kombëtar, interesi i Shqipërisë si shtet kërcënohet nga kjo situatë dhe ky rajon nuk është as i Albinit dhe as i Aleksandrit, dhe ky rajon është i popujve i shteteve që popullojnë dhe administrojnë”, shtoi Rama.
Madje, Rama akuzoi Kurtin pasi siç tha ai, nuk ka dashur ballafaqimin e drejtpërdrejt për të diskutuar për situatën në veri.
Teksa shtoi se marrëveshjet mes dy vendeve që ishin gati për tu firmosur mund të firmoseshin po njësojë pa pasur nevojë për të dhënë një shfaqje sikur gjërat janë normale.
“Jam i gatshëm të takohem me Albinin në çdo moment, iu kam thënë në nivel personal nuk ka asnjë problem, fare zero….por në nivelin konceptual kemi probleme dhe probleme të mëdha shumë”, tha ai.
Në këtë konferencë për media, Rama foli edhe për draftin e Asociacionit ku tha se nuk ia ka dërguar as Kosovë dhe as Serbisë, por Gjermanisë dhe Francës, dhe është një kontribut për normalizimin e marrëdhënieve mes dy vendeve.
Kronika e gazetarit Lindrit Zejnullahu.
