Njohësit e çështjeve politike vlerësojnë se dorëheqja e kryetarit të LDK-së, Lumir Abdixhiku është e pashmangshme pas rezultatit zgjedhor dhe dorëheqjen e Hykmete Bajramit nga pozita e nënkryetares së partisë.
Sipas tyre kjo parti nuk është në rrugën e duhur.
Politologu Melazim Koci ka thënë se pas Bajramit priten edhe dorëheqje të tjera nga pozitat drejtuese të kësaj partie duke shtuar se dorëheqja e Abdixhikut nuk do të duhej të diskutohej.
Ai ka thënë se LDK pati rënie në zgjedhjet e 28 dhjetorit për shkak të refuzimit të koalicionit me LDK-në. Koci në emisionin “Ditari” në Tëvë1 ka thënë se një koalicion me LDK-në do t’i konvenote Abdixhikut, por sipas tij ai këtë nuk e bërë për të shmangur përçarjet brenda partisë.
“LDK ka humbur 30% të votës për shkak të mos hyrjen në koalicion me LVV. Si kryetar i partisë Abdixhikut do të kishte konvenuar, por hyrja në një koalicion i tillë do ta ndante në dy blloqe LDK-në”, ka thënë ai.
Ndërsa, Dorajet Imeri politolog, vlerëson se Lidhja Demokratike e Kosovës nuk është në rrugën e duhur.
Ai ka thënë se humbja e madhe e elektoratit është alarm për këtë parti.
“Fakti që kanë humbur 30% të elektoratit i bie që çdo i treti njëri që ka qenë me LDK-në nuk është më. Është një kambanë për LDK-në. Ky format i organizmit të LDK-së me disa individë që janë kryetarë komunash dhe të cilët e mbajnë njëfarë peshe e bëjnë subjektin politik një grup parapolitik, ku individ me përgjegjësi të caktuara bëhet bashkë dhe ruajnë njëfarë komoditeti brenda strukturës”, ka thënë ai.
Të mërkurën, Hykmete Bajrami njoftoi se ka dhënë dorëheqje nga pozita e nënkryetares së partisë.
Ajo bëri të ditur se dorëheqjen ia ka kërkaur edhe kryetarit të LDK-së, Lumir Abdixhikut, i cili ka thënë se dorëheqjen do ta paraqesë para Kuvendit të partisë.
