Qendërsulmuesi Mirlind Daku ka ftuar tifozët që të ofrojnë mbështetje maksimale për Shqipërinë në ndeshjen miqësore ndaj Jordanisë.
Daku ka theksuar se kjo ndeshje është një mundësi për të festuar fitoren historike ndaj Serbisë.
Shqipëria do të luajë ndaj Jordanisë të martën në stadiumin “Air Albania” në Tiranë, duke nisur nga ora 19:00.
“Ju presim të martën në stadiumin ‘Air Albania’, ku do të luajmë ndaj Jordanisë. Meqë nuk patëm mundësi të takoheshim me të gjithë pas ndeshjes me Serbinë, pas asaj fitoreje madhështore, ju presim tani në ndeshjen me Jordaninë dhe pastaj do të festojmë atë fitore historike. Faleminderit për përkrahjen dhe vazhdoni ta doni kombëtaren,” u shpreh Daku për faqen zyrtare të FSHF-së.
Kujtojmë që Shqipëria fitoi të shtunën në stadiumin “Duboçica” në Leskovc ndaj Serbisë, me golin e shënuar nga Rey Manaj në minutën e parë shtesë të pjesës së parë.
Ndeshja i takoi Grupit K kualifikues për Botërorin që do të zhvillohet vitin tjetër në Kanada, Meksikë dhe SHBA.
