Autoritetet shqiptare kanë shpallur teologen nga Kosova, Igballe Berisha-Huduti, si person të padëshiruar në territorin e Shqipërisë për një periudhë 15-vjeçare.
Vendimi është marrë me urdhër të ministrit të Brendshëm, Besfort Lamallari, dhe bazohet në vlerësimet e institucioneve përgjegjëse të sigurisë, të cilat kanë konsideruar se aktiviteti i saj paraqet rrezik për sigurinë kombëtare, rendin kushtetues dhe sigurinë publike në vend.
Sipas mediave shqiptare, urdhri është dërguar për zbatim te Policia e Shtetit dhe strukturat e Kufirit dhe Migracionit.
Çështja mori vëmendje të madhe publike pasi kryeministri i Shqipërisë, Edi Rama, e përmendi Hudutin në lidhje me protestat kundër projektit të resortit turistik në Zvërnec. Rama pretendoi se ajo ishte përfshirë në protestë si e infiltruar dhe publikoi fotografi ku ajo shihet pranë ish-presidentit iranian Mahmoud Ahmadinejad.
Autoritetet shqiptare kanë ngritur pretendime edhe për lidhje të saj me regjimin iranian, si dhe për deklarime publike që bien ndesh me rendin kushtetues të Shqipërisë.
Pas këtyre akuzave ka reaguar vetë Berisha-Huduti, duke i mohuar pretendimet dhe duke theksuar se pjesëmarrja e saj në protestat e Tiranës ka qenë e motivuar vetëm nga bindjet qytetare dhe patriotike.
Ajo ka deklaruar se angazhimi i saj buron nga shqetësimi për zhvillimet në vend dhe nga e drejta e qytetarëve për të kundërshtuar vendimet që i konsiderojnë të dëmshme për interesin publik.
Në reagimin e saj publik, Huduti u ka bërë thirrje institucioneve shqiptare, Bashkimit Evropian dhe faktorëve ndërkombëtarë që të dëgjojnë zërin e protestuesve, duke theksuar se synon dialog, drejtësi dhe respekt reciprok.
“Nuk kërkoj armiqësi me askënd. Kërkoj paqe me drejtësi, dialog me respekt dhe një Shqipëri më të mirë për të gjithë”, është shprehur ajo.
