Kombëtarja e Shqipërisë po kthehet në shtëpi nga “Euro 2024” pasi doli e fundit në grup me vetëm një pikë, por këto fakte nuk tregojnë asgjë për paraqitjen pasionante të “kuqezinjve” kundër tri ekipeve kryesore të turneut.
Shqipëria ishte pjesë e Grupit B, të cilin e përbënin edhe Spanja, Italia e Kroacia ku regjistroi dy humbje e një barazim.
Në duelin e parë, u mposht 2:1 nga Italia por Shqipëria vendosi rekord pasi shënoi golin me të shpejtë në Evropian kur Nedim Bajrami zhbllokoi shifrat pas vetëm 23 sekondave lojë.
Kundër Kroacisë, në ndeshjen e dytë, Shqipëria sërish kaloi e para në epërsi dhe në fund barazoi 2:2, ndërsa në përballjen e fundit të grupit pësoi 1:0 nga Spanja ndonëse pati paraqitje të mirë.
Krahas paraqitjeve në fushë, Shqipëria mund të krenohet edhe me përkrahjen që e pati në tribuna.
Tifozët shqiptarë befasuan të gjithë me përkrahjen e tyre të fuqishme, disiplinën dhe numrin e madh në tribuna. Në fund të fundit, pjesëmarrja për herë të dytë në Evropian është një përvojë e mirë dhe sinjal se Shqipëria do të ketë paraqitje më të shpeshta në turne të tillë.