Takimi i parë pritet të mbahet gjatë kësaj jave, ndërsa nga Bashkimi Demokratik për Integrim, në ueb-faqen e tyre kanë njoftuar se takimi i parë ndërqeveritar do të mbahet të martën e 19 korrikut.
Profesori Universitar nga Maqedonia e Veriut, Mesel Bilalli thotë se nga hapja e negociatave e deri në anëtarësim mund të marrë një dekadë kohë, por ai tutje tregon për procedurat që do të ndiqen tash e tutje.
“Pra nesër ose pasnesër mbahet konferenca ndërqeveritare ku duhet të miratohet korniza biseduese pra është procedurë konstante dhe menjëherë pas asaj, pas miratimit të kornizës biseduese, bëhet një screening, një proces i cili në shumë shtete të afërsisë ballkanike pra zgjatë më tepër se një vit e gjysmë. Kështu që Maqedonia nuk do ta ketë shumë problem çështjen e ndryshimeve kushtetuese”, tha ai.
Edhe njohësi i çështjeve politike në Shqipëri, Ben Andoni, thotë se procesi deri te anëtarësimi do të zgjas së paku 10 vjet dhe sipas tij, Shqipëria ka kapituj të vështirë për të mbyllur.
Në Samitin e fundit mes Bashkimit Evropian dhe liderëve të Ballkanit, u ritheksua nevoja që të rikthehet vëmendja kah zgjerimi i BE-së në rajonin e Ballkan, si dëshmi edhe të zgjerimit të Unionit, karshi përhapjes së ndikimit rus në këtë pjesë të Evropës.
Raporti i gazetarit Valmir Gallopeni.
