Azerbajxhani do të jetë kundërshtari i fundit i Kombëtares së Shqipërisë para Kampionatit Evropian të futbollit që këtë verë mbahet në Gjermani.
Miqësoren kundër Azerbajxhanit, Shqipëria e luan më datën 7 qershor, ka njoftuar Federata Shqiptare e Futbollit (FSHF), të martën.
Kjo do të jetë ndeshja e katërt miqësore e Shqipërisë para pjesëmarrjes në “Euro 2024”. Duelet tjera miqësore, Shqipëria i ka më Kilin, Suedinë dhe Lihtenshtajnin. Kundër Kilit, Shqipëria do të luaj më 22 mars në Itali, ndërsa tri ditë më vonë, do të përballet edhe me Suedinë në Stokholm.
Krahas Azerbajxhanit, Shqipëria në fillim të qershorit do të luaj edhe kundër Lihtenshtajnit. Kjo përballje zhvillohet më 3 qershor, katër ditë para miqësores me Azerbajxhanin. Në Evropianin e këtij viti, Shqipëria bën pjesë në Grupin B, së bashku me Italinë, Kroacinë dhe Spanjën.
Ndeshjen e parë në Evropian, Shqipëria e luan më 15 qershor kundër Italisë, përpara së të përballet me Kroacinë katër ditë më vonë. Duelin e fundit në grup, Shqipëria e luan kundër Spanjës më 24 qershor.
