Mjekët endokrinologë dhe jo vetëm japin alarmin për rritjen e obezitetit në popullatë, pasi gati 30% e të rriturve janë mbi peshë, por situata pritet të rëndohet për shkak të ushqimeve të pashëndetshme që konsumojnë fëmijët.
Obeziteti është shkaktari kryesor për sëmundje të rëndësishme si ato kardiovaskulare diabet apo infarkte të trurit.
“Obeziteti është shndërruar në problem madhor pasi rrit sëmundje që janë shkaktar kryesor të vdekshmërisë. Në pavijonin e endokrinologjisë nga 900 pacientë që u shtruan deri nëntor të këtij viti, 700 prej tyre ishin me diabet dhe gati 20 % e tyre me këmbën diabetike”, tha Florian Toti, mjek endokrinolog.
Sëmundja e diabetit dëmton edhe sistemin nervor, dhe pothuajse mbi gjysma e pacientëve që bëjnë ishemi apo hemorragji cerebrale janë me diabet.
Mjekët insistojnë që prindërit të ndërgjegjësohen që të orientojnë fëmijët dhe jo vetëm drejt një stili jetese të shëndetshme.
Organizata Botërore e Shëndetësisë (OBSH) ka bërë thirrje për ndryshimin e politikave për të parandaluar obezitetin duke promovuar stil jetese të shëndetshëm, por të rriten taksat ndaj pijeve me sheqer dhe subvencionimi i ushqimeve të shëndetshme. /tch
