Një ngjarje e rëndë familjare ka tronditur Orikumin këtë të premte. Sipas të dhënave paraprake, një 40-vjeçare me inicialet S.Xh. është gjetur pa shenja jete brenda banesës së saj, ndërsa bashkëshorti, 50-vjeçari Llogora Xh., dyshohet se është autor i ngjarjes dhe është gjetur i pajetë në garazhin pak metra larg shtëpisë.
Burime bëjnë me dije se çifti ndodhej në proces divorci. Mësohet gjithashtu se çifti ishin prindër të dy fëmijëve, përkatësisht të moshave 16 dhe 18-vjeç. Policia ndërkohë ka sekuestruar armën pistoletë të gjetur në vendngjarje.
Forcat e policisë kanë mbërritur menjëherë në vendngjarje dhe kanë nisur hetimet për të zbardhur rrethanat dhe shkaqet që çuan në këtë tragjedi.
“Orikum/Informacion paraprak
Sot, rreth orës 13:30, është marrë njoftim nga urgjenca mjekësore se një shtetase, në Orikum, është gjetur pa shenja jete dhe me shenja dhune në banesë. Nga veprimet e para hetimore dyshohet se shtetasja S. Xh., 40 vjeçe, është vrarë nga bashkëshorti i saj, shtetasi Ll. Xh., 50 vjeç.
Pas kontrolleve të ushtruara nga shërbimet e Policisë në zonën përreth kësaj banese, në garazh është gjetur dyshohet i vetëvrarë me armë zjarri autori i kësaj ngjarjeje, shtetasi Ll. Xh.
Arma pistoletë e gjetur në vendngjarje u sekuestrua në cilësinë e provës materiale.
Grupi hetimor, nën drejtimin e Prokurorisë, vijon punën për dokumentimin e plotë të rrethanave të kësaj ngjarjeje“, thuhet në njoftimin e policisë./rtsh.al/
