Ishte nipi i heroit, Isa Boletini.
E përgjatë jetës së tij, Tafil Boletini, mbajti disa poste të rëndësishme.
Kështu, Lufta e Dytë Botërore, Tafilin e gjeti si prefekt të Elbasanit.
Nga kjo pozitë, iu drejtua mbretërisë së atëhershme të Shqipërisë, me një kërkesë të veçantë.
Përmes saj, ai kërkoi që qindra hebrenjve t’iu lëshohen pasaportat shqiptare.
Arsyen pse e bëri këtë, për Tëvë1 e ka zbuluar vet stërnipi i Isa Boletinit, Gazmendi.
“Në këtë periudhë kohore, Tafil Boletini, ishte prefekt i prefekturës së Elbasanit dhe në kohën e fundit janë zbuluar edhe dokumentacionet që Tafil Boletini i shpëtoi me qindra hebrenjtë duke iu dhënë nënshtetësinë dhe pasaportat shqiptare dhe kjo iu ndihmoi jashtëzakonisht hebrenjve, duke i ndryshuar edhe emrat personal”, tregon ai për Tëvë1.
Ky veprim, bëri që shumë hebrenj t’i shpëtojnë më të keqes.
Populli Hebre të cilët ishin larguar nga Greqia dhe Bullgaria, kishin dalë në vendbanimet në Maqedoninë e Veriut, në Strugë, Gostivarë e Dibër dhe një pjesë e konsiderueshme që ishin larguar, kishin marrë drejtimin drejt Elbasanit, thotë stërnipi i Isa Boletinit
Së fundmi, u bë e ditur se restaurimi i Qendrës Kulturore Hebraike në Prizren, po shkon drejt fundit.
Për këtë, një vend të veçantë në të pritet ta zë edhe Tafil Boletini.
“Edhe shteti i Republikës së Kosovës është duke ndërtuar një muzeum hebrenj, madje këto ditë është publikuar edhe në mediet tona. Një kënd do t’i kushtohet me dokumentacion dhe lista hebrenjsh të cilët u shpëtuan gjatë luftës së dytë botërore nga Tafil Boletini. E gjithë lista e hebrenjve të cilëve iu ka dhënë pasaporta, sot janë në librin “Udhëtimi”, thotë Gazmend Boletini.
Ndryshe, të enjten është shënuar 80 vjetori i përfundimit të Luftës së Dytë Botërore, gjatë së cilës u vranë plot 6 milionë hebrenj në atë që njihet si holokausti.
