Shërbimi i Kërkim-Shpëtimit Malor të Kosovës ka njoftuar se të hënën në Malin e Korabit kanë shpëtuar dy turistë, njëri shqiptar, ndërsa tjetri gjerman.
Sipas njoftimit, turistëve u ishte përkeqësuar gjendja shëndetësore në një kohë tepër të shkurtë, pasi kishin ngrënë një bimë helmuese.
“Fatmirësisht një nga turistët ka patur vetëdije dhe mbulueshmëri me rrjet telefonik mobil dhe ka kërkuar ndihmë duke i dërguar edhe koordinatat e tyre. Dy nga anëtarët e ShKShMK kanë qenë duke i zhvilluar aktivitetet e tyre shumë afër lokacionit dhe me të marr lajmin janë nisur në vendodhjen e tyre”, thuhet në njoftim.
Tutje thuhet se atyre u është dhënë ndihma e parë dhe janë mbajtur në kontroll, por për shkak gjendjes së tyre të rënduar shëndetësore dhe kritike është kërkuar ndihmë për evakuim nga ajri.
“Autoritetet Shqiptare pa humbur kohë kanë nisur një ekip mjekësh dhe staf të shpëtuesve nga njësia ajrore, të cilët me të arritur kanë filluar me procedurat emergjente mjekësore dhe i kanë evakuar në Qendrën Spitalore Universitare në Tiranë”, theksohet në njoftim.
