Njohësi i çështjeve të sigurisë në Kosovë, Fatmir Çollaku, tha se shpërthimi i së premtes në Mitrovicë të Veriut mund të ketë lidhje me arrestimin e disa qytetarëve serbë si të dyshuar për krime lufte në Kosovë, raporton teve1.info
Çollaku në emisionin “Info-Nata” në Tëvë1, tha se pas epilogut shterp të dialogut të Kosovës me Serbinë, është e pritshme sipas tij që të ketë destabilizim të vendit.
“Edhe këto arrestimet e fundit të të dyshuarve për krime lufte mund të jenë një pretekst që shpërthimi që ndodhi mund të ketë lidhshmëri të kauzave me të, por mund edhe mos të ketë fare një lidhje me të. Por një është e vërtetë që nuk ka nevojë të jemi shumë të përgatitur profesionalisht për me kuptu që pas këtij epilogu shterp të këtij dialogu dhe bisedimeve të pasuksesshme është pak a shumë e pritshme që të ketë destabilizim të vendit por në masën ose formatin që ishte në muajin prill nuk besoj që do të lejohet sepse edhe NATO edhe misioni i KFOR-it në Kosovë , selia e NATO-s në Bruksel janë të vetëdijshëm që mund të eskaloj në atë masë sa me pas edhe viktima dhe lëndime siç ishte rasti i amputimit të këmbës së ushtarit të KFOR-it”, tha Çollaku.
Ai shtoi se mund të ketë aksione destruktive në veri të cilat Serbia i organizon përmes instrumenteve të saj në Kosovë.
“Aksionet subversive dhe diverzive janë më të mundshme krahas aksioneve dhe iniciativave tjera destruktive që mund t’i organizoj Serbia përmes instrumenteve që i ka si dorë e zgjatur në Kosovë si strukturat paralele, si qarqet kriminale, si ato agjencionet të cilëve u është dhënë pagë një kohë të gjatë nga Serbia e kështu me radhë. Prandaj, nuk është problem me i aktivizu strukturat e tilla, mirëpo, vizavi këtyre strukturave dhe veprimeve të tyre është policia e Kosovës dhe Qeveria e Kosovës me mjetet e veta legale, në rastin konkret me policinë e Kosovës të cilat gjithnjë për mendimin tim ka qenë në krye të detyrës dhe në një mënyrë apo tjetër këto sfida i ka përballu suksesshëm”, u shpreh Çollaku.
