Dy ura hekurudhore u shembën dhe dy trena dolën nga shinat në Rusinë perëndimore gjatë natës, njoftuan zyrtarët të dielën.
Incidenti i parë ndodhi të shtunën në Bryansk, ku ura u shemb mbi një tren pasagjerësh, duke shkaktuar vdekjen e shtatë personave dhe plagosjen e dhjetëra të tjerëve.
Disa orë më vonë, një tjetër urë u shemb në Kursk, duke nxjerrë nga shinat një tren mallrash. Ky shpërthim shkaktoi zjarr, por nuk pati viktima, sipas guvernatorit lokal në detyrë, Alexander Khinshtein.
Komiteti Hetues i Rusisë konfirmoi se shpërthimet ishin shkaku i shembjes së urave, por nuk dha më shumë detaje.
Pamjet nga vendngjarja në Bryansk tregojnë vagonë të dëmtuar dhe mbetje betoni nga ura e shembur. Dëshmitarë të tjerë në mediat sociale filmuan skenën nga automjetet e tyre, të cilat kishin shmangur kalimin në urë para shembjes.
Në të kaluarën, zyrtarët rusë kanë fajësuar sabotatorë pro-ukrainas për sulmet ndaj infrastrukturës hekurudhore, por informacionet mbeten të pakonfirmuara.
Ndërkohë, inteligjenca ushtarake ukrainase (GUR) njoftoi të dielën se një tren rus që transportonte ushqime dhe karburant drejt Krimesë ishte hedhur në erë.
Megjithatë, GUR nuk e mori përgjegjësinë për sulmin dhe nuk përmendi urat e shembura, duke theksuar vetëm se një “arterie” kyçe që lidhte Rusinë me rajonet e pushtuara, si Zaporizhzhia dhe Krimea, ishte shkatërruar, raporton AP.
Rusia ka pushtuar Krimenë që nga viti 2014 dhe është aktive ushtarakisht në rajonin e Zaporizhzhisë që nga pushtimi i Ukrainës në shkurt 2022.
