Mbrëmë në veri të Mitrovicës ka ndodhur një detonim, konkretisht në rrugën “Kolashini”, afër lagjes “Tre Rrokaqiejt”.
Lajmin për teve1.info e ka konfirmuar zëdhënësi i Policisë së Kosovës, Baki Kelani, i cili tha se ende nuk është lokalizuar vendi se ku ka ndodhur shpërthimi.
Kelani bëri të ditur se mjeti i cili dyshohet se ka shpërthyer në atë zonë ka qenë një shokë-bombë, derisa shtoi se nuk është hasur në dëme anësore.
Gjithashtu, ai tha se në vendin e ngjarjes kanë dalë njësitet policore dhe kanë patrulluar në atë lokacion.
“Sot me datën 03.07.2023 rreth orës 00:52 , është pranuar një informatë se në rrugën Kolashini te tre rrokaqiejt është ndëgjuar një detonim/shpërthim. Njësitet policore kanë dalur dhe kanë patrulluar në atë lokacion, njëkohësisht kanë biseduar me disa qytetar, por nuk është lokalizuar ndonjë vend se ku ka ndodhur detonimi/shpërthimi. Mjeti i cili dyshohet se ka shpërthyer në atë zonë, ka qenë shok-bomb, dhe nuk është hasur në dëme anësore”, tha Kelani.
Ndërsa zëvendës drejtori rajonal për veriun e Kosovës, Veton Elshani, konfirmoi për teve1.info se nga shpërthimi nuk ka persona të lënduar, si dhe nuk ka dëme./teve1.info/
