Pak muaj më parë, u dënua me 24 vite burgim për vrasje të rëndë.
Por të hënën, Dibran Hoxha u pa në humor të mirë.
I njohur si “Kobra”, mori pjesë në seancën e Apelit.
Mbrojtja e tij po kundërshton vendimin e Themelores që e dënoi atë për vrasjen e një shtetasi të Shqipërsië dhe lëndimin e dy të tjerëve.
“Gjendja faktike e cila është keqinterpretu, keqadministru, keqkonstatu nga ana e Gjykatës së shkallës së parë. Sepse nëse shikohen edhe dëshmitë e dëshmitarëve këtu në shqyrtim gjyqësor, që të dyja që kanë qenë prezent aty thonë se personat nga Shqipëria i kanë rrahur krejt këta dhe ne Dibranin e kemi pa vetëm pas momentit kur kemi dalë nga zyra. Domethënë ato janë mshelë në zyre, nuk kanë guxu me dalë për shkak të dhunës që kanë ushtru personat”, ka thënë Latifaj.
Një kërkesë për kolegjin e apelit e pati edhe vet Dibran Hoxha.
“Nëse ka mundësi edhe me ma pru dëshmitarin policin që kur kanë kalu ata, i ka pa pasaportat. Policin e doganës së Shqipërisë me ma sjellë si dëshmitarë nëse ka mundësi”, u shpreh Hoxha.
Përpos “Kobrës”, Themelorja dënoi edhe katër të akuzuarit e tjerë.
Roland Susurin e dënoi me 7 vjet burgim, për çka mbrojtja e tij kërkoi nga shkalla e dytë që i njëjti të lirohet nga dy prej tre akuzave që rëndojnë mbi të.
“I ka shqiptuar një dënim të rëndë dhe kërkojmë nga Gjykata e Apelit që të njëjtin ta lirojë nga dy veprat e para, manipulim të provave dhe mbajtje të paautorizuar të armëve. Kurse, eventualisht ta shpallë fajtor për veprën pjesëmarrje në rrahje, për të cilën edhe vet ai ka pranuar se është e vërtetë se në natën kritike ka ndodhur një rrahje, ku edhe ky ka marrë pjesë”, theksoj Salihu.
Tetorin e vitit të kaluar, Jesmir Badalli u dënua me 2 vjet burgim, kurse Arben Vezaj dhe Burim Mazreku secili me nga një vjet burgim.
“Vendimi është i mbështetur vetëm në deklaratat e të dëmtuarave, të cilat janë kontradiktore mes vete”, ka thënë Rakatati.
“Propozoj Gjykatës së Apelit që të mbrojturin tim, Arben Vezaj, ta liroj në mungesë provash”, ui shpreh Gjini
“Kjo çështje të kthehet në rigjykim dhe në rivendosje”, theksoj Gjini.
Kurse, prokuroria dhe përfaqësuesi i palës së dëmtuar, kërkuan dënim më të lartë për secilin prej të akuzuarve.
“Sipas Kodit Penal parashihen edhe rrethanat veçanërisht rënduese, që mund të shqiptohet dënim më i lartë. Dhe Gjykata e shkallës së parë, në këtë drejtim, siç duket nuk ka pasë vëmendje të shtuar nga provat dhe rrethanat që janë drejtuar në Gjykatën e shkallës së parë. Prandaj, ne paraqesim kërkesën që dënimi prej 24 vitesh të ndryshohet dhe të jetë më i lartë”, u shpreh Kastrati.
Sipas dosjes së prokurorisë, deri tek vrasja e shtetasit të Shqipërisë, kishte ardhur pas një përleshje në lokalin “Kobra City”, pasi të viktimat nuk kishin pranuar të paguanin faturën e lokalit.
