Policia e Kosovës ka bërë të ditur përmes një sqarimi publik se nuk janë dokumente zyrtare, disa e-mail adresa me informacione, të cilat përmbajnë logo të PK-së, logo qeveritare, vule të ndryshme dhe një mbishkrim të EUROPOL.
Sipas njoftimit të Policisë së Kosovës, këto e-maila janë lëshuar me qëllim të palës së caktuar për urdhër gjykate, dhe sqaron se nuk janë dokumente zyrtare të këtij institucioni.
Gjithashtu PK potencon se këto e-mail adresa nuk përmbajnë formatin dhe shkrimin zyrtar të PK-së, si dhe nuk janë lëshuar nga adresat zyrtare.
“Policia e Kosovës si institucion i zbatimit të ligjit, në bashkëpunim dhe koordinim me organet e drejtësisë, pas sigurimit të informacioneve rreth qarkullimit të e-mailave/dokumenteve të tilla, ka filluar hetimet intensive duke angazhuar njësitet kompetente policore, me qëllim të hetimit, verifikimit dhe zbulimit të kryerësve të kësaj vepre penale”, thuhet në njoftimin e Policisë së Kosovës.
Ndërkaq, ky organ i sigurisë ka bërë thirrje që qytetarët të mos bien pre e dezinformacioneve dhe mashtrimeve të tilla.
“Policia e Kosovës, njofton dhe njëherit fton qytetarët që të mos bien pre e dezinformacioneve/mashtrimeve të tilla, dhe kushdo që mund të pranoj ndonjë e-mail/dokument të tillë, ta adresojë në adresën zyrtare të PK-së [email protected] për trajtim dhe kompetencë të mëtejme”./teve1.info/
