Deputetët miratuan dokumentin që përcakton procedurat për seancën konstituive të Kuvendit sipas aktgjykimit të Gjykatës Kushtetuese, duke sqaruar procedurën e kryesimit të seancës konstituive, nominimin dhe zgjedhjen e kryetarit, mënyrën e zgjedhjes së nënkryetarëve dhe çështje të tjera.
Megjithatë parlamentarët nuk kanë arritur kompromis që dokumenti ta rregullojë çështjen e ndëshkimit financiar të deputetëve që mungojnë nëpër seanca pa arsye.
Ata janë dakorduar që këtë ta bëjë Kryesia përmes nxjerrjes së një akti të veçantë.
Eugen Cakolli, hulumtues në Institutin Demokratik të Kosovës konsideron që është problematike lënia e një çështje të tillë në dorë të Kryesisë.
“Duke e ditur mënyrën e funksionimit të Kryesisë, kompozicionin politik të saj, është vështirë e besueshme që Kryesia do të arrijë në të ardhmen që të adresojë një problem kaq akut të Kuvendit siç është mungesa e deputetëve në seanca meqenëse aty sërish bëhen kompromisë të tjera”, tha Cakolli.
Ndërsa Jeton Hasani nga Instituti i Kosovës për Drejtësi thekson se nuk shpjegohet qartë se si do ta bëjë këtë Kryesia.
“Në rastin konkret qëndron problemi sepse nuk është precizuar sa duhet kjo çështje në rregullore dhe tani nuk dihet realisht se si do ta interpretojë Kryesia e Kuvendit, pra është dashur në mënyrë shprehimore të parashihet se Kryesia e Kuvendit me akt të veçantë rregullon format e sanksionimit financiar dhe pastaj do të mbetej në diskrecion mekanizmi i njoftimit, kë ta njoftonin ata deputetë…”, tha Hasani.
Pavarësisht miratimit, deputetë lanë të hapur mundësinë e plotësim-ndryshimit të rregullores.
Raporti i gazetarit Gojart Jashari.
