Në një deklaratë, Shoqata e Shtypit të Huaj (FPA) tha se është “e indinjuar” nga ajo që e përshkroi si vrasje të synuar të gazetarëve palestinezë nga ushtria izraelite në Qytetin e Gazës.
“Këta kolegë po kryenin detyrën e tyre si gazetarë dhe po raportonin për ngjarjet ashtu siç ndodhnin”, shtoi ajo, citon Al Jazeera.
Grupi tha se gjatë 22 muajve të fundit, ushtria izraelite “i ka etiketuar vazhdimisht gazetarët palestinezë si militantë, shpesh pa prova të verifikueshme, duke i shndërruar ata në shënjestra”.
Ajo akuzoi qeverinë izraelite se vazhdon të shpifë për gazetarët palestinezë “të cilët kanë raportuar me guxim gjatë gjithë luftës pavarësisht rrezikut të madh personal të përfshirë”, si dhe mbulimin nga shtypi i huaj, ndërsa u ndalon gazetarëve të huaj të hyjnë në Gaza në mënyrë të pavarur që nga fillimi i luftës.
“Ne i bëjmë thirrje Izraelit të ndërpresë sulmet ndaj gazetarëve në Gaza dhe t’u lejojë gazetarëve të hyjnë dhe të raportojnë lirisht”, tha FPA-ja.
