Shoqata Humanitare Bamirëse “Bereqeti”, thotë se po përcjellë me shqetësim lajmet, ku qytetarë të shumtë janë mashtruar duke blerë produkte me çmim më të lartë me arsyetimin për të ndihmuar familjet në nevojë.
Shoqata ka bërë të ditur se disa individë po keqpërdorin emrin e shoqatës “Bereqeti”, e cila funksionon në kuadër të Kryesisë së Bashkësisë Islame të Ksovoës.
“Bazuar në raportimet e medieve në Kosovë, shoqata dhe individ të tillë po keqpërdorin emrin e “Bereqetit” e cila funksionon në kuadër të Kryesisë së Bashkësisë Islame të Kosovës, për çka si shoqatë nuk kemi asnjë njohuri për dhe as nuk kemi bashkëpunuar asnjëherë. ‘Bereqeti’ ka koordinatorët e saj në gjithë Kosovë në secilën komunë, ku veç tjerash mund të orientoheni edhe përmes imamëve të xhamive”, thuhet në njoftimin e kësaj shoqate të publikuar në Facebook.
Tutje, në njoftim thuhet se shoqata në vazhdimësi ka bërë thirrje që qytetarët të kenë kujdes me pasurinë e tyre, dhe mënyrën se si t’i ndihmojnë të tjerët.
“’Bereqeti’ në vazhdimësi ka bërë thirrje dhe vazhdon të bëjë thirrje që të keni kujdes me pasurinë tuaj dhe mënyrë sesi tentoni të ndihmoni të tjerët. Ju lutem për kujdes të shtuar që të mos bini pre e mashtrimeve të tilla. Mënyra më e mirë dhe e sigurtë për të ndihmuar të tjerët është ‘Bereqeti’”, thuhet në njoftim./teve1.info/
