Policia në Gjilan ka gjobitur një shofer i cili kishte kryer tejkalim të parregullt në komunikacion, duke rrezikuar sigurinë e pjesëmarrësve të tjerë në rrugë.
Sipas njoftimit të policisë, rasti kishte ndodhur më 3 maj, ndërsa veprimi i kundërligjshëm u dokumentua përmes pamjeve video të realizuara nga qytetarët.
Në video shihet momenti kur drejtuesi i automjetit kryen një manovër të rrezikshme tejkalimi në rrugë.
“Pas pranimit të pamjeve, Njësiti Rajonal i Komunikacionit Rrugor në Gjilan ka ndërmarrë veprimet operative për identifikimin e shoferit, me ç’rast ndaj tij është shqiptuar gjobë në përputhje me legjislacionin në fuqi”, thuhet në njoftim.
