Historiani zviceran, Oliver Jens Schmitt ka thënë se historiografia shqiptare në Shqipëri është zhvilluar në kohën e komunizmit.
Ai është shprehur se rishikimi i historisë, ishte një koncept autoritar, sepse siç tha ai nuk mund të zëvendësohej një koncept zyrtar siç ishte ai komunist me një version tjetër.
Në një intervistë për emisionin “InfoNata” në Tëvë1, Shmitt ka thënë se as për lirin e tij për Skënderbeun e cila kishte ngjallë shumë reagime nuk mund të besohej se një historian mund të shkruajë si i pavarur.
“Historiografia shqiptare u zhvillua në Shqipërinë komuniste, pas rënies së komunizmit, Shqipëria ballafaqohej se si mund të ndryshojë sistemi shkencor. Ishte fjala për rishkrimin e historisë. Rishkrimi i historisë ishte një koncept autoritar, sepse nuk mund të zëvendësosh një koncept zyrtar, komunist me një version tjetër. Edhe në kohën e botimit të librit tim nuk besohej se një historian punon i pavarur, sepse ishte epoka e komunizmit” është shprehur ai.
Historiani më famë botërore, ka folur edhe për studimet në historinë e Kosovë dhe Shqipërisë në kohën e sotme.
Ai ka vlerësuar se historia në Kosovë në krahasim më shkencat tjera shoqërore është më konservatore.
“Në Kosovë në krahasim me fushat tjera shkencore historia është pak konservatore, shkencat shoqërore janë më të hapura, por normal ka gjithmonë përjashtime”, ka thënë Shmitt.
Në Shqipëri sipas tij, ka një tendencë për hapje, por që ka thënë se është një sfidë.
“Në Shqipëri situata është krejt ndryshe, ka një tendencë për hapjen por unë mendoj se kjo mbetet një sfidë për të gjithë”, ka thënë Shmitt në Tëvë1.
Historiani zviceran ka folur edhe për Rendin e ri botëror, pas ardhjes në pushtet në ShBA të presidentit Donald Trump.
Shmitt, ndonëse e ka vlerësuar si të paparashikueshëm presidentin Trump, është shprehur se është herët të bëhet një analizë, pasi siç ka thënë është muaji i dytë i sistemit të ri.
