Rajoni i Mitrovicës është përfshirë të mërkurën nga shkyçje masive të konsumatorëve nga rrjeti i ujësjellësit, për shkak të mospagesës së faturave të ujit.
Kompania Rajonale e Ujësjellësit “Mitrovica” ka bërë të ditur se ky aksion po zhvillohet pas njoftimeve dhe vërejtjeve të vazhdueshme me shkrim, të dërguara ndaj konsumatorëve me obligime të papaguara.
Sipas njoftimit zyrtar, shkyçjet janë duke u realizuar në të gjithë rajonin dhe do të vazhdojnë ndaj secilit konsumator që nuk ka shlyer detyrimet ndaj shërbimit të ujit.
Nga KRU “Mitrovica” u është bërë thirrje qytetarëve që kanë borxhe të papaguara t’i kryejnë pagesat sa më parë, në mënyrë që të shmangin ndërprerjen e furnizimit me ujë dhe masat ndëshkimore të parapara me legjislacionin në fuqi.
“Pas njoftimeve të rregullta dhe vërejtjeve të vazhdueshme me shkrim lidhur me pagesën e faturave të ujit, edhe sot kanë vazhduar shkyçjet masive në të gjithë rajonin, të cilat do të vazhdojnë tek secili konsumator me obligime”, thuhet në njoftimin e kompanisë.
Tutje, kompania ka ftuar konsumatorët që, përveç pagesës së borxheve, të paraqiten edhe për marrëveshje riprogramimi me këste, me qëllim të shmangies së masave të mëtejshme.
