Edhe sot, Shkupi është në mesin e 10 qyteteve me ndotjen më të lartë të ajrit në botë.
Sipas tabelës së platformës për matjen e ndotjes së ajrit “IQ Air”, në orën 09:45, Shkupi ishte në vendin e shtatë në botë dhe është qyteti më i ndotur në Evropë.
Me vlerën e nivelit të grimcave të dëmshme PM prej 164 njësi, ajri në Shkup është në kategorinë e shënuar me ngjyrë të kuqe si ajër “i pashëndetshëm”, shkruan Alsat.
Lista e qyteteve më të ndotura kryesohet nga Dhaka (197) në Bangladesh, Lahore (180) në Pakistan dhe Delhi në Indi (174).
Nga qytetet në Evropë, pas Shkupit, sipas ndotjes së ajrit, Sarajeva është në vendin e 35-të, Bukureshti në vendin e 36-të dhe Prishtina në vendin e 37-të.
Ditët e fundit, Shkupi është ndër qytetet më të ndotura në Evropë dhe në botë.
