Shkreta në emisionin “Ditari” në Tëvë1, tha se në këtë fazë nuk mund të thonë se ka pasur keqpërdorime në Fondin për Sigurime Shëndetësore.
“Ne nuk mund ta themi tash në këtë fazë që ka pasur keqpërdorime, janë raportuar edhe nga mediat, por edhe ne në mbledhjen e fundit të Komisionit Parlamentar për Shëndetësi e kemi pasur në raportim Plakiqin”, deklaroi ai.
Sipas tij, më shqetësuese është se Fondi për Sigurime Shëndetësore për këto vite, për shumë arsye nuk e ka kryer misionin e vet.
“Në fakt, ajo që më shumë është shqetësuese Fondi për Sigurime Shëndetësore në vetvete për këto vite për shumë arsye nuk e ka kryer misionin e vet. Fillimisht është diskutuar shumë edhe në media fondi i trajtimit jashtë institucioneve, por në fakt fondi i sigurimeve shëndetësore misionin e ka përtej këtij programi, e që në vetvete është te krijimi i parakushteve, respektivisht kryerja e detyrave dhe obligimeve në mënyrë që përfundimisht të sigurohen parakushtet dhe mekanizmat për krijimin e mundësisë për mbledhjen e premiumeve dhe sigurimeve shëndetësore për qytetarët e Kosovës”, tha Shkreta. /teve1.info/
