Superylli kolumbian Shakira anuloi koncertin e saj të së dielës në Lima (Peru) pasi u shtrua në spital për shkak të disa problemeve me stomakun.
Artistja latine ndau një deklaratë në Instagram dhe X pasditen e së dielës, duke thënë se aktualisht është e shtruar në spital dhe se mjekët e informuan se nuk ishte në gjendje të performonte.
“Jam shumë e trishtuar që nuk do të mund të ngjitem në skenë sot. Kam qenë thellësisht e emocionuar për ribashkimin me publikun tim të dashur peruan”, tha ajo.
Këngëtarja mbërriti në Peru të premten në mbrëmje, ku ishte planifikuar të performonte të dielën dhe të hënën. Kjo është ndalesa e dytë në turneun e saj në Amerikën Latine, Las Mujeres Ya No Lloran, pas dy netëve në Brazil javën e kaluar, shkruan tch.
Fansat latinë i kanë bërë një pritje të ngrohtë Shakirës, me turma që mblidhen në aeroporte për ta përshëndetur.
Në deklaratën e saj, Shakira tha se shpreson të shërohet së shpejti. “Plani im është që ta performoj këtë shfaqje sa më shpejt. Ekipi im tashmë është duke punuar për një datë të re”, tha ajo.
