Analisti politik Selam Shkodra, në emisionin “Ditari” në Tevë1, ka folur për situatën aktuale politike në vend, me fokus të veçantë procesin e rinumërimit të votave dhe pasojat që mund të ketë bllokimi i institucioneve.
Shkodra vlerësoi se rinumërimi i votave është një proces që mund të menaxhohet dhe të përfundojë pa e futur vendin në një krizë të re politike.
“Mendoj se partitë do t’i certifikojnë rezultatet, më pas do të konstituohet Kuvendi, do të formohet Qeveria dhe do të zgjidhet Presidenti. Besoj që këto rinumërime mund të përfundojnë dhe të menaxhohen pa na futur në situata të tjera politike,” ka deklaruar ai.
Ai paralajmëroi se çdo tentativë për bllokim të institucioneve mund të ketë pasoja serioze për partitë politike, si në pozitë ashtu edhe në opozitë.
“Si opozita ashtu edhe pozita duhet të ndërmarrin veprime të matura, që çojnë drejt zgjidhjes së krizave dhe jo drejt krijimit të tyre. Qytetarët po i vëzhgojnë me vëmendje këto zhvillime,” u shpreh Shkodra.
Sipas tij, nëse vendi do të shkojë sërish në zgjedhje për shkak të bllokimit institucional, qytetarët do ta japin vlerësimin e tyre për sjelljen politike të partive.
“Në rastin më të keq, nëse na çojnë përsëri drejt votimit, partitë do të marrin vlerësimin e qytetarëve. Nëse do të ketë një sjellje si ajo e vitit 2025, me bllokim të formimit të institucioneve, besoj se disa parti rrezikojnë seriozisht të dalin nga skena politike,” tha ai.
