Analisti politik Selam Shkodra, në emisionin “Ditari” në Tëvë1, ka komentuar listat përfundimtare të kandidatëve për deputet nga partitë politike në vend, duke u ndalur veçanërisht te Lidhja Demokratike e Kosovës dhe mungesa e ish-ministrit Agim Veliu në listë.
Sipas Shkodrës, Veliu ka pasur ndikim të madh politik në zonën e Podujevës dhe mos-përfshirja e tij mund të reflektohet negativisht për LDK-në në zgjedhjet e ardhshme.
“Mendoj që në zonën ku ka operuar z. Agim Veliu ka qenë politikan i nivelit lokal. Në vitin 2020, me partinë e tij që bëri koalicion me LVV-në, ai u bart në nivelin qendror të institucioneve. Ka qenë edhe ministër i Arsimit; ndonëse nuk la ndonjë shije të veçantë në arsim, ai ka qenë shumë i pranishëm pranë qytetarëve të Podujevës. Pa një mbështetje të tillë nuk do t’i fitonte disa palë zgjedhje radhazi. Mendoj që në atë zonë kjo mund të ketë efekt dhe mos-përfshirja e tij mund t’i kushtojë LDK-së me votë”, ka deklaruar Shkodra.
Ai shtoi se përbërja e listave të partive do të ketë ndikim të drejtpërdrejtë në rezultatin zgjedhor, veçanërisht në zona ku figurat politike kanë krijuar bazë të fortë për vite me radhë.
