Analisti, Selam Shkodra, ka deklaruar se liderët opozitarë nuk kanë besuar që do t’i fitojnë zgjedhjet parlamentare, të cilat do të mbahen nesër (9 shkurt).
Shkodra tha se mosbesimin e tyre e kanë shfaqur nëpërmjet fushatës, ku edhe qytetarët kanë arritur që ta marrin si mesazh.
“Liderët e opozitës janë dukur të pavetëbesim dhe asnjëherë nuk e kanë thënë në mënyrë shprehimor e kategorike e nuk e kanë përçuar mesazhin te qytetari që do të jenë fitues të zgjedhjeve. Asnjëri nuk e ka përçuar. Zotëri Haradinaj edhe nëse e ka thënë, askush s’e merr seriozisht.Po flas për partitë konkurrente që munden ta përmbysin rezultatin. Ka edhe parti që do t’i marrin 2 për qind edhe thonë që do t’i fitojnë zgjedhjet”, tha analisti.
Shkodra tha se kryeministri Albin Kurti ka vuajtur nga vetëbesimi i tepërt, për dallim prej liderëve opozitarë që kanë vuajtur nga mosbesimi i tyre.
“Kryeministri ka vuajtur nga vetëbesimi i tepërt, për dallim prej liderëve opozitarë që kanë vuajtur nga mosbesimi i tyre që do t’i fitojnë zgjedhjet. Momentin që ti nuk e ke një vetëbesim të tillë, qytetari atë e ndjen”, tha ai./teve1.info/
