Ish-zëvendësministri i Punëve të Brendshme, Selam Shkodra, thotë se procesi i konvertimit të patentë shoferëve nga ilegalë në RKS po ecë mirë, pasi që komuniteti serb është vetëdijesuar duke u pajisur me dokumente legale.
Shkodra thotë se komuniteti serb del një hap para nëse integrohet në jetën e përditshme të qytetarëve të Kosovës.
“Çdo ditë e më shumë, komuniteti serb po vazhdon që të vetëdijesohet që duhet të pajisen me dokumente legale që janë të Republikës së Kosovës, pasi që të njëjtit janë pjesë e këtij territori. Komuniteti serb është një hap para nëse dëshiron me u integru në jetën e përditshme dhe në juridiksionin e Kosovës. Institucionet e vendit duhet t’i kryejnë këto shërbime dhe afati është i mjaftueshëm dhe besoj që të njëjtit do ta shfrytëzojnë. Deri më 9 gusht do të finalizohet i tërë procesi”, tha ai në emisionin “Ditari” në Tëvë1.
Lidhur me këtë çështje është deklaruar edhe ministri i tashëm i Punëve të Brendshme, Xhelal Sveçla, i cili tha se 29 serbë kanë konvertuar patentë shoferët ilegalë.
Sveçla ka thënë se vendimi për konvertim u mor pas kërkesave nga komuniteti serb e Policia e Kosovës.
“Sot ka filluar me sukses zbatimi i vendimit të Ministrisë së Punëve të Brendshme i cili do zgjasë tre muaj dhe brenda këtij afati qytetarët tanë të cilët posedojnë patentë shoferi të strukturave ilegale serbe do të kenë mundësi t’i konvertojnë ata në patentë shoferi të Republikës së Kosovës. Vetëm sot, 29 qytetarë janë përgjigjur pozitivisht thirrjes në 9 komuna të Republikës së Kosovës”, ka shkruar ministri në Facebook.
Ai ka thënë se kjo do të jetë një mundësi e mirë për qytetarët, pasi që mund të qarkullojnë lirshëm brenda Kosovës.
Procedura për pajisje me patentë shoferi të Republikës së Kosovës zgjat pesëmbëdhjetë ditë.
Patentë shoferi i lëshuar nga strukturat serbe i kthehet aplikuesit si dokument i pavlefshëm dhe i njëjti pajiset me patentë shoferin e Republikës së Kosovës.
Aplikimi do të jetë i hapur deri më 9 gusht të këtij viti./teve1.info/
