Pas rreth 48 orësh kërkime, është gjetur sot (10 korrik) trupi i pajetë i kapitenit Arben Anamali, i cili u mbyt në liqenin e Shkodrës, pasi i shpëtoi jetën dy turistëve.
Trupi i pajetë i 51-vjeçarit u gjet nga palombarët rreth orës 5 të mëngjesit.
Pasditen e 8 korrikut, Arben Anamali, kapiteni i anijes “Drini”, që menaxhohet nga Bashkia e Shkodrës për qëllime turistike, ishte nisur për lundrim me një grup turistësh. Pavarësisht erës së fortë, mësohet se disa prej turistëve këmbëngulën që të hidhen për t’u larë në ujërat e liqenit. Kjo rezultoi e vështirë në ato rrethana, për shkak se ujërat e trazuar filluan t’i largojnë turistët disa metra nga mjeti lundrues, duke e bërë të domosdoshme ndërhyrjen e kapitenit fillimisht me kamerdaret e shpëtimit dhe pastaj duke u hedhur ai vetë në ujë për t’i shpëtuar. Megjithëse arriti t’i nxjerrë me sukses të tjerët nga rreziku, kapiteni nuk mundi të kthehej përsëri në anijen e tij.
Gjesti i Anamalit dhe sakrificat e tij deri në vetëmohim për të shpëtuar jetët e të tjerëve preku thellë opinionin publik, duke u vlerësuar si një shembull i jashtëzakonshëm i humanizmit dhe guximit.
Presidenti Bajram Begaj e konsideroi kapitenin Anamali një “model shoqëror” dhe “shpirt heroik”.
Arben Anamali punonte për Bashkinë e Shkodrës prej një viti si kapiten i licensuar. Ai ishte baba i dy fëmijëve. /rtsh.al/
Tragjedi në Liqenin e Shkodrës, kapiteni i anijes mbytet duke shpëtuar 2 turistë
