Komisioni Disiplinor i Shërbimit Korrektues të Kosovës ka pezulluar përkohësisht nga marrëdhënia e punës zyrtarin korrektues me inicialet D.Q., i angazhuar në Qendrën Korrektuese të Dubravës.
Sipas njoftimit të ShKK-së, vendimi është marrë pas inicimit të procedurës disiplinore për dyshim për shkelje të rëndë disiplinore dhe do të mbetet në fuqi deri në marrjen e një vendimi tjetër.
“Shërbimi Korrektues i Kosovës njofton opinionin publik se, me vendim të Komisionit Disiplinor të datës 14.07.2026, është pezulluar përkohësisht nga marrëdhënia e punës zyrtari korrektues D.Q., i angazhuar në Qendrën Korrektuese të Dubravës”, thuhet në njoftimin e ShKK-së.
Institucioni thekson se masa është ndërmarrë pas fillimit të procedurës disiplinore.
“Vendimi është marrë pas inicimit të procedurës disiplinore për dyshim për shkelje të rëndë disiplinore dhe do të mbetet në fuqi deri në marrjen e një vendimi tjetër”, thuhet më tej në njoftim.
Ky vendim vjen një ditë pasi Prokuroria Themelore në Pejë, përkatësisht Departamenti për Krime të Rënda, ngriti aktakuzë ndaj D.Q., nën dyshimin për kryerjen e veprës penale “Marrja e ryshfetit”.
Sipas Prokurorisë, i pandehuri, në cilësinë e personit zyrtar, dyshohet se gjatë periudhës qershor–gusht 2025, në tri raste të ndara, ka pranuar në mënyrë të tërthortë përfitime në të holla nga një person i privuar nga liria.
Shërbimi Korrektues i Kosovës ka theksuar se mbetet i përkushtuar ndaj zbatimit të ligjit dhe ruajtjes së integritetit institucional, duke respektuar njëkohësisht prezumimin e pafajësisë.
“Shërbimi Korrektues i Kosovës mbetet i përkushtuar në zbatimin e ligjit, ruajtjen e integritetit institucional dhe trajtimin me seriozitet të çdo rasti që dyshohet për shkelje të detyrave zyrtare, duke respektuar njëkohësisht prezumimin e pafajësisë deri në një vendim përfundimtar të organeve kompetente”, thuhet në njoftimin e ShKK-së.
