Zjarr dhe tym u pa në Libanin jugor pranë kufirit me Izraelin të enjten.
Kjo pasi grupi libanez Hezbollah dhe Izraeli vazhduan të përplaseshin përgjatë kufirit.
Hezbollah konfirmoi se gjatë ditës ka gjuajtur raketa në fshatin izraelit të Manaras dhe se Izraeli i është përgjigjur me zjarr artilerie në periferi të Mais al Jabal, shkëmbim artileri i cili paraqet përshkallëzimin më të keq të dhunës në kufi që 17 vjet.
Ndërkohë raportohet se Izraeli ka evakuuar tashmë qytetarët të cilët banonin brenda dy kilometrave nga kufiri i tij me Libanin.
Edhe Shtetet e Bashkuara dhe Britania e Madhe paralajmëruan qytetarët e tyre që të largohen nga Libani në rast të përkeqësimit të raporteve mes dy fqinjëve.
Që nga fillimi i luftës Hamas-Izrael, përleshje sporadike kanë shpërthyer në kufirin midis Hezbollahut dhe grupeve të armatosura palestineze në Liban nga njëra anë dhe forcave izraelite nga ana tjetër, me frikën e një lufte më të gjerë nëse Hezbollahu hyn plotësisht në përleshje.
Hezbollahu, i cili luftoi me Izraelin në vitin 2006 thotë se 13 luftëtarë të tij janë vrarë deri më tani në shkëmbimet ndërkufitare që janë ndezur që nga 7 tetori, kur grupi palestinez Hamasi sulmoi Izraelin jugor dhe forcat izraelite nisën një kundërofensivë në Gaza.
Izraeli dhe SHBA-ja kanë paralajmëruar në mënyrë të përsëritur Hezbollahun të qëndrojë jashtë konfliktit Izrael- Hamas.
Ndërkohë Presidenti amerikan, Joe Biden do ta mbajë një fjalim para kombit, pas mesnate, dhe fokusi pritet të jetë në Ukrainë dhe përkeqësim të situatës së sigurisë në botë.
Ai pritet ta përmendë edhe luftën mes Izraelit dhe Hamasit, teksa përgatitet t’ia kërkojë Kongresit amerikan 100 miliardë dollarë si fonde, pjesa më e madhe e të cilave pritet të ndahet për Kievin./Tëvë1/
