Kuvendi Komunal i Gjilanit në një seancë të jashtëzakonshme ka shkarkuar kryesuesin, Arianit Sadikun.
Sadiku është shkarkuar me 19 vota për dhe një kundër.
Kërkesën për shkarkimin e kryesuesit, në emër të 19 anëtarëve të Kuvendit, të cilët e kanë iniciuar këtë çështje, e ka arsyetuar Avdyl Aliu nga radhët e Lidhjes Demokratike të Kosovës.
“Aliu ka thënë se Kuvendi nuk ka funksionuar mirë që prej fillimit, ndërkaq prej korrikut të vitit 2022 e këndej është futur në krizë dhe nuk po mund të funksionojë, si pasojë e mungesës së bashkëpunimit, prandaj nuk ka kuptim për të vazhduar kësisoj më tutje”, thuhet në njoftimin e Komunës së Gjilanit.
Ndërkaq, kryetari i Gjilanit, Alban Hyseni, tha se adresimi për dështimin e seancave të Kuvendit Komunal nuk mund të drejtohet vetëm nga një person, pasi që sipas tij kryesuesi e ka për obligim vetëm administrimin e seancës, por jo edhe sigurimin e numrave.
“Për më tepër ai tha se qëllimi i opozitës, përmes kësaj loje të fshehtë e tinëzare, është diku tjetër”, thuhet në njoftim.
“Kjo është një tentativë për ta prishur LVV ndërmjet vete, siç u veprua me koalicionin, por kjo nuk do të ndodh”, tha Hyseni.
Tutje thuhet se kryesuesi i ri i Kuvendit nuk ka mundur të zgjidhet sot, meqë ishte vetëm një propozim, Kushtrim Kadriu (Vatra) ndërkaq, sipas statutit, duhet të jenë së paku dy propozime./teve1.info/
