Në një mbledhje të jashtëzakonshme të zhvilluar sot, Këshilli Bashkiak i Tiranës ka votuar me 51 vota pro, për shkarkimin e Erion Veliajt nga detyra e kryetarit të Bashkisë.
Vendimi vjen si pasojë e një propozimi të bërë publikisht nga kryeministri Edi Rama gjatë Asamblesë së Partisë Socialiste, ku ai shpalli si kandidate për drejtimin e bashkisë ministren aktuale të Shëndetësisë, Ogerta Manastirliu.
Mbledhja u hap me një deklaratë nga kryetarja e Këshillit Bashkiak, Megi Fino, e cila u shpreh se ky vendim përfaqëson një hap për “çlirimin” e kryeqytetit.
“Sot po përmbushim detyrën tonë, duke i dhënë fund një gjendjeje të ngjashme me ndalim pa gjyq ndaj qytetit, të shkaktuar nga Erion Veliaj,” u shpreh ajo.
Ajo theksoi se i vetmi qëllim i mbledhjes ishte shqyrtimi dhe miratimi i propozimit për largimin e Veliajt.
Pas këtij vendimi të Këshillit Bashkiak, pritet që Këshilli i Ministrave të japë miratimin përfundimtar për shkarkimin zyrtar të Veliajt nga detyra.
Sipas nenit 115 të Kushtetutës, Erion Veliaj ka të drejtë të ankimojë këtë shkarkim pranë Gjykatës Kushtetuese brenda 15 ditësh nga data e vendimit. Në rast ankimimi, ekzekutimi i vendimit pezullohet deri në shqyrtimin e çështjes nga Gjykata./gazetashqip
