Kryeministri i Kosovës, Albin Kurti së bashku me ministrin e Mjedisit, Planifikimit Hapësinor dhe Infrastrukturës, Liburn Aliu dhe me ambasadorin gjerman Matias Kondrad gjatë së hënës vizituan dyqanet në Prishtinë. Qëllim kishin thirrjen për të ndaluar blerjen e qeseve të plastikës. E çmimi i tyre prej pesë cent, nga ekspertët e çështjes po konsiderohet zhvatje për konsumatorët.
U nisën nga qeveria për të vizituar marketet.
E qëllim të përbashkët, kryeministri i Kosovës Albin Kurti dhe ministri i Mjedisit, Planifikimit Hapësinor dhe Infrastrukturës, Liburn Aliu kishin apelin ndaj qytetarëve për të mos blerë qese të plastikës.
Nga këtu, i pari i ekzekutivit foli për udhëzimin e ri administrativ, në bazë të së cilit çmimi i një qeseje plastike kushton pesë cent.
E prej tyre, nga xhepi i konsumatorit – dy cent i dedikohen buxhetit të shtetit.
“Prej 25 deri 50 mikron qeset e plastikes nuk do të kenë logo, do të kushtojnë pesë cent, 2 cent shkojnë në buxhet të shtetit, përjashtim bëjnë këto qeset prej 0 deri 25 mikron, sepse nuk kanë as vjegëza as doreza dhe përdoren për fruta e perime, dhe për gjerat higjienike, ndërkaq logot përdorën vetëm për ato të cilat janë mbi 50 mikron”, tha Kurti.
Mirëpo me vendosjen e çmimit për qeset e plastikes, nuk po pajtohen qytetarët.
“Shtrenjtë vallahi, 5 cent shtrenjtë është, dihen kushtet këtu, dihet rroga çfarë rroga ka, rroga është e vogël, e qesja shumë shtrenjtë është”, tha qytetari, Fitim Halimi.
Ka të tjerë që çmimin 5 centë nuk po e shohin të shtrenjt.
“Nuk është edhe aq i lartë çmimi i tyre kundrejt këtyre produkteve tjera, për pesë cent nuk është shtrenjtë”, u shpreh qytetari Milaim Krasniqi.
Ndërsa nga mërgimtarët po mirëpritet ky vendim.
“Jo nuk janë shtrenjtë dhe është ide e mirë për me rujtë ambientin”, u shpreh qytetari Lulëzimi.
Megjithatë ky udhëzim administrativ sipas Shoqatës ‘’Konsumatori’’ sjell zhvatjen e konsumatorëve.
“Që nga fillimi, udhëzimi administrativ është në kundërshtim me kauzën e konsumatorit, me të drejtat, obligimet, interesat dhe identitetin e tij. Sepse qytetari si konsumator nuk është marrë parasysh, nuk ka marrë pjesë në debat, diskutim as në hartim. Dhe së këndejmi bie që ky dokument sjell vendim zhvatës për konsumatorin”, deklaroi kryetari i Shoqatës Konsumatori, Selatin Kaçaniku.
Ndërsa vazhdimi i shitjes së qeseve me logo nga ana e bizneseve, po kritkohet nga ekonomistët.
“Abuzuesit të cilët veprojnë në këtë rast, i bëjnë marketing biznesit të vet në mënyrë të pandërgjegjshme, duhet të veprojë shteti në këtë rast, duhet t’i ndëshkojë ata”, tha ekonomisti, Jakup Bellaqa.
Tëvë ka drejtuar pyetje ndaj Ministrisë së Industrisë, Ndërmarrësisë dhe Tregtisë lidhur me inspektimet e kryera në dyqane lidhur me keqpërdorimet e këtyre të fundit për përdorimin e qeseve të plastikës me logo, mirëpo nga ky institucion gjatë së hënës nuk është kthyer përgjigje.
Udhëzimi administrativ për shitjen e qeseve plastike ka hyrë në fuqi tash e një muaj.