Një nga kompjuterët më të rrallë në histori, modeli Apple-1, është shitur për një çmim marramendës prej 475 mijë dollarësh amerikanë në një ankand të mbajtur në Boston. Kompjuteri, i cili i përket grupit të parë prej vetëm 50 njësish të prodhuara nga bashkëthemeluesit e Apple-it, Steve Jobs dhe Steve Wozniak në vitin 1976, është një nga vetëm nëntë ekzemplarët funksionalë që ekzistojnë edhe sot.
Modeli i shitur, i njohur si “Byte Shop Apple-1”, përmban një kabinetë prej druri dhe vjen në gjendje të plotë pune, një fakt që ka ndikuar në vlerësimin e lartë të tij në tregun e koleksionistëve.
Fillimisht ishte parashikuar që pajisja të shitej për rreth 300 mijë dollarë, por çmimi përfundimtar tejkaloi pritshmëritë, duke dëshmuar vlerën historike dhe koleksionuese të teknologjisë së hershme të Apple.
Kompjuteri i quajtur “Moore Apple-1” i përkiste zonjës June Blodgett Moore, e njohur si gruaja e parë që ka diplomuar në Fakultetin e Drejtësisë në Universitetin Stanford.
Pajisja erdhi në ankand me të gjithë komponentët përkatës: tastierën origjinale, “interface” për kaseta, si dhe softuerin Apple BASIC.
Modeli Apple-1 është konsideruar si themeli mbi të cilin u ndërtua perandoria e teknologjisë së Apple.
Në atë kohë, këta kompjuterë shiteshin për vetëm 666.66 dollarë dhe përbënin një revolucion për teknologjinë kompjuterike të asaj kohe.
Ndërkaq, nga kompania Apple ka ardhur një njoftim i rëndësishëm që lidhet me softuerin iOS 26.
Apple më në fund e ka pranuar atë që përdoruesit e iPhone-it tashmë e kanë vënë re pas çdo përditësimi të madh të sistemit operativ; instalimi i versionit më të ri iOS 26 do të ndikojë përkohësisht në kohëzgjatjen e baterisë.
Megjithatë, nga kompania qetësojnë përdoruesit duke theksuar se kjo është një dukuri normale dhe nuk duhet të shkaktojë shqetësim.
Arsyeja përse bateria konsumohet më shpejt qëndron në faktin se pas përditësimit nisin shumë procese në sfond.
Ndër to janë indeksimi i të dhënave, shkarkimi i burimeve shtesë për funksione të reja dhe përditësimi automatik i aplikacioneve.
Apple thekson se kjo është një çështje e përkohshme dhe funksionimi i baterisë do të kthehet në normalitet pas disa ditësh, kur të përfundojnë të gjitha proceset.
