Stadiumi “Air Albania” në Tiranë, do të jetë i stërmbushur për ndeshjen Shqipëri – Gjeorgji, që zhvillohet në kuadër të Ligës së Kombeve.
Federata Shqiptare e Futbollit (FSHF), ka njoftuar se tashmë të gjitha biletat për këtë përballje janë shitur dhe ka falënderuar tifozët shqiptarë për mbështetjen e madhe ndaj ekipit kuqezi.
Dueli ndërmjet Shqipërisë dhe Gjeorgjisë, zhvillohet të martën prej orës 20:45 dhe i takon Grupit B1 të Ligës B të Ligës së Kombeve.
Si Shqipëria ashtu edhe Gjeorgjia, e kanë nisur me fitore kampanjën e re të Ligës së Kombeve dhe përballja ndërmjet tyre pritet të jetë e fortë dhe interesante.
Shqipëria në xhiron e parë triumfoi 2:1 ndaj Ukrainës në Pragë, ndërsa Gjeorgjia e mposhti Çekinë me rezultatin e thellë 4:1.
