E para e shtetit, Vjosa Osmani ka mbledhur sot në takim krerët e institucioneve të sigurisë dhe drejtësisë pas vrasjes së dy grave brenda pak ditëve. Presidentja Osmani tha se e nevojshme është që të ketë ndryshime në Kodin Penal, derisa ministrja Albulena Haxhiu nuk e mohoi mundësinë e krijimit të një taskforce për trajtimin e dhunës ndaj grave.
Vrasja e dy grave brenda një jave ka alarmuar institucionet e sigurisë dhe drejtësisë.
Për të diskutuar mbi hallkën brenda këtyre institucioneve, e para e shtetit, Vjosa Osmani takoi të martën ministrin e Punëve të Brendshme, Xhelal Sveçla, drejtorin e Policisë, Gazmend Hoxha dhe ministren e Drejtësisë, Albulena Haxhiu.
Aty u tha se e nevojshme është te ketë ndryshime në Kodin Penal.
“Në takim, Presidentja Osmani shprehu shqetësimin e thellë në lidhje me trendin alarmues të vrasjes së grave dhe nevojën urgjente që të fuqizohen të gjitha hallkat brenda institucioneve të sigurisë dhe drejtësisë, të cilat kanë detyrim kushtetues që ta mbrojnë jetën e qytetarëve tanë. Përgjatë takimit u diskutua edhe nevoja e rritjes së ndëshkimeve e poashtu për ndryshimet e nevojshme në Kodin Penal”, kanë deklaruar nga Presidenca e Kosovës.
E ministri Sveçla e drejtori i Policisë, Hoxha, gjatë ditës ishin pjesë edhe e një takimi të thirrur nga ministrja Haxhiu.
Pas takimit, e para e MD-së tha se disa nga institucionet që kanë për detyre t’i mbrojnë gratë, sipas saj kanë dështuar.
“E vetëdijshme jam që shumë prej institucioneve që kanë përgjegjësi për të mbrojtur jetën e vajzave dhe grave kanë dështuar ta bëjnë atë – për shkak të mosveprimeve apo veprimeve të gabuara të tyre. Prandaj duhet t’i thërrasim në përgjegjësi çdo institucion”, ka thënë ministrja e Drejtësisë, Albulena Haxhiu.
Ministrja Haxhiu u shpreh se që nga paslufta janë 99 gra të vrara nga partnerët e tyre, derisa theksoi faktin se në baza mujore pranohen mbi 200 raportime për dhunë.
Derisa sipas saj, e nevojshme është që të adresohet secili lëshim në procedurë të rregullt i dhunuesve.
“Të adresohet secili lëshim që lidhet me lëshime në procedura të rregullta, të lëshohet udhëzues detyrues nga kryeprokurori i shtetit, që kur ka dyshime për dhunë në familje, të mos ketë lëshime në procedurë të rregullt, pasi shteti dhunuesin po e shndërron në vrasës, kur e sheh që po ledhatohet nga sistemi do ta përsërisë sërish. Në asnjë nga rastet e dhunës në familje nuk është shqiptuar dënimi maksimal”, është shprehur Haxhiu.
Ministrja Haxhiu nuk e ka përjashtuar mundësinë e krijimit të një taks force për trajtimin e rasteve të dhunës ndaj grave, por edhe bëri të ditur se dorëheqja e saj nuk e zgjidh këtë problem.
Pjesë e takimit të thirrur nga Haxhiu ishin edhe zëvendëskryeprokurori i shtetit Agron Qalaj, kryesuesi i Këshillit Gjyqësor të Kosovës, Albert Zogaj dhe anëtari i Këshillit Prokurorial, Jetish Maloku.
Gresa Bardhecaj